Белгиските весници откриваат нови елементи од истрагата за наместените фудбалски натпревари во Белгија, во кои се вмешани српски и македонски граѓани.
Новинарите откриваат детали од прислушувани телефонски разговори на агентот Дејан Вељковиќ со двајца судии, Барт Вертентен и Себастиен Делфериер. Од разговорите излегува дека Вељковиќ ги корумпирал судиите, пишуваат весниците денеска.
Неколку дена пред натпреварот помеѓу Антверп и Еупен, Вељковиќ телефонски му порачува на судијата Вертентен дека „најважното е Антверп да победи“. Според новинарите, на тој натпревар судијата свирнал „непостоечки“ пенал, по што, според прислушуваните разговори, Вељковиќ им се пофалил телефонски за овој потег на Тјери Стеманс и играчот Матс Ритс.
За време на друг натпревар, против Шарлероа, повторно Вељковиќ во телефонски разговор со Стеманс вели дека „Вертентен добро разбра што треба да прави“.
Од разговорите не може да се дознае колкав надомест добил судијата, пишуваат весниците, но „јасно е дека двајцата се многу блиски“.
Во разговор во февруари годинава, Вељковиќ исто така му се пофалил на тренерот на Бриж, Иван Леко, дека „Вертентен е под контрола“.
Што се однесува до другиот судија, Делфериер, разговорите откриваат дека тој му ветил на Вељковиќ дека нема да суспендира еден од неговите играчи, Софиан Хани, иако тој требало да биде санкциониран поради напад во натпревар против Стандард.
Префрлени се 10.000 евра на сметката на судијата, но Вељковиќ тврди дека станува збор за заем. Сепак, разговорите откриваат дека тоа всушност било „подарок“ за фудбалската школа на Делфериер.
