Поранешниот британски премиер Борис Џонсон во интервју за Sky News го спореди рускиот преседател Владимир Путин со покојниот српски лидер Слободан Милошевиќ.
Џонсон во интервјуто говореше за Украина, Владимир Путин, одговорот на Западот, својот наследник и други теми, а единствено не сакаше да зборува за своето заминување од функцијата летоска.
За тоа дали претседателот Путин би можел да употреби нуклеарно оружје како дел од континуираното војување во Украина, Џонсон истакна дека „не мисли дека ќе употреби“ бидејќи тоа би предизвикало хистерична реакција како кај противниците така и кај руските сојузници.
„Мислам дека треба да е луд за тоа да го направи. Би ја збришал својата земја од клубот на цивилизирани нации. Тоа би било целосна катастрофа за Русија“, рече тој.
Џонсон истакна и дека Путин „катастрофално погрешил“ кога одлучил да ја нападне Украина велејќи дека неговата порака за Украина звучела како кога Слободан Милошевиќ говорел за Косово.
„Сите ние во британската влада го прочитавме неговиот луд есеј за Украина, кој го објави минатото лето. Тој фундаментално погреши во проценувањето на Украина. Тоа беше како да го читате Слободан Милошевиќ на тема Косово. Милошевиќ мислеше дека Косово е интегрален дел од Голема Србија и духовна татковина на српската нација. Мислам дека Путин истото го мисли за Киев и за потеклото на православната вера“, објасни Џонсон.
„Тоа е тотална грешка. Украина е слободна и независна европска култура со свој идентитет, со свои амбиции и судбина. Направи фундаментална грешка“, додаде.
