Поранешниот американски претседател Џорџ Буш ја нарече инвазијата на Ирак за брутална и неоправдана, а потоа се исправи велејќи дека всушност мисли на руската инвазија на Украина. Грешката се случи во текот на говор во Далас, во кој Буш ја критикуваше руската политика.
„Резултатот е непостоење на контрола и рамнотежа, што овозможи еден човек да започне целосно неоправдана и брутална инвазија на Ирак“, рече Буш, а потоа одмавнувајќи со главата се исправи: „Сакам да кажам на Украина“.
Потоа се пошегува велејќи дека годините очигледно го прават своето, што предизвика смеа кај публиката.
САД во 2003 година, кога Буш беше претседател, ја предводеа инвазијата на Ирак со изговор дека земјата поседува оружје за масовно уништување, кое сепак никогаш не беше пронајдено. Во долготрајниот конфликт загинаа стотици илјади луѓе, а уште повеќе ги напуштија своите домови.
Коментарот на Буш се рашири на социјалните мрежи, со над 3 милиони прегледи на Тњитер откако снимката ја објави новинар на Далас Нус.
Во критиката со која го осуди рускиот претседател Владимир Путин, Буш го спореди украинскиот претседател Володимир Зеленски со британскиот воен челник Винстон Черчил.