Бројот на заразени со новиот коронавирус во светот надмина 8 милиони, покажуваат најновите статистички податоци.
Според информациите што ги генерира сајтот Worldometers, заклучно со статистиките за изминатите 24 часа, ширум светот има 8.018.693 заразени со COVID-19. Од нив 436.137 починале, а 4.141.103 оздравеле.
Бројот на активни случаи низ светот изнесува 3.441.453, а на затворени 4.577.240.
Најопасно жариште на коронавирусот се САД – таму има 2.162.406 регистрирани заразени, од кои 117.859 починаа, а 870.076 оздравеа.
На второ место е Бразил со 867.882 случаи, 43.389 починати и 453.568 оздравени од COVID-19.
Трета по број на заразени е Русија, со 537.210 потврдени случаи и 7.091 починат пациент.
На второ место по број на смртни случаи е Велика Британија каде досега се регистрирани 41.698 починати пациенти со COVID-19.
Италија и Шпанија, кои во почетокот беа жаришта на заразата во Европа, бележат намален број на заразени и починати.
Според официјалните податоци, епидемијата со новиот коронавирус почна во декември, 2019 година во Кина, а по еден месец се прошири низ речиси целиот свет.
Сега има регистрирани случаи во 213 земји и територии, а некои земји, како Нов Зеланд, прогласија крај на пандемијата со 0 новозаразени.
Концентрацијата на вирусот преку Азија се пренесе во Европа, а сега е најголема во Северна и Јужна Америка. Светската здравствена организација предупредува дека можни се невидени кобни последици ако коронавирусот продолжи да се шири во Африка.
Според најновите податоци од македонското Министерство за здравство, досега во земјава се направени вкупно 43.881 тестирање на COVID-19.
Вкупната бројка на ковид дијагностицирани во нашата земја од почетокот на епидемијата изнесува 4.157, бројката на оздравени пациенти е 1.723, на починати е 193, а во моментов бројот на активни случаи во земјата изнесува 2.241.