Реал Мадрид убедливо со 3:1 ја победи Барселона во првото првенствено Ел Класико оваа сезона.
Каталонските медиуми се крајно незадоволни од играта на својот тим, но уште повеќе од судиите кои ги прогласија за пристрасни во корист на нивните најголеми ривали и актуелни лидери во Ла Лига.
„Што мора да се случи? Скандалозно, каков пенал не беше свирнат за Барселона“ и „Напад на Алаба врз Левандовски“ се насловите на двата написи на Sport во кои се издвојуваат потенцијални грешки на штета на Барселонба. Според нив, на Барселона ѝ е одземен најмалку еден удар од белата точка, а сметаат дека Реал можел да остане и со играч помалку.
Каталонците сметаат дека им биле одземени два пенала
Кога се во прашање дуелите меѓу Дани Карвахал и Роберт Левандовски, дури две ситуации се спорни и дел од навивачите на Барселона сметаат дека нивниот клуб можел да добие пенал. Една е ситуацијата од 75. минута. Полскиот напаѓач за малку ќе шутираше кон голот, а Карвахал го сопна одзади без да сака да ја игра топката.
„Карвахал стартуваше кај Левандовски и го собори пред сите во шеснаесетникот на Реал во посебна голгетерска шанса“, пишува Sport и додава: „Судијата Санчез Мартинез беше добро поставен, виде сè, но сепак не досуди пенал.“
Фудбалерите на Барселона гласно протестираа, но судијата дозволи играта да продолжи. Тој не отиде во ВАР да ја разгледа ситуацијата, иако играчите тоа го бараа од него. Тој дури го предупреди Чави, кој побара од него да ја објасни одлуката. Некои навивачи го споредија тоа со пеналот досуден за Реал во судиското надополнување.
Втората ситуација, помалку контроверзната, се случи малку порано на натпреварот. Уште една топка на Барселона беше нафрлена кон Левандовски. Полјакот го издржа воздушниот дуел со Милитао, но Карвахал му постави мост и тој падна.
Агресијата на Алаба врз Левандовски
Уште една контроверзна ситуација во која жртва беше полскиот напаѓач е онаа од првото полувреме. Тој остана да лежи по дуелот со Алаба, а снимката открива како бил удрен во лицето од австрискиот дефанзивец. Тој се пожали на судијата и се држеше за лицето.
Мадрид имаше минимална предност во тој момент, а видовме уште една контроверзна акција. Чист удар во лицето, а судијата досуди само прекршок за Барселона. Гути во емисијата по натпреварот изјави дека тоа не било за црвен картон бидејќи Левандовски бил „далеку од топката“.