Италијанскиот астроном Фабио Пакучи објаснува дека супермасивните црни дупки имаат маса што е милиони, па и милијарда пати поголема од онаа на Сонцето и дека зазеле толку огромни пропорции со тоа што голтаат материја и се спојуваат со други црни дупки.
Во анимираното TED-Ed видео насловено „Дали е можно црна дупка да ја голтне Земјата?“, Пакучи, кој е на постдокторски студии на Јеил, објаснува дека една супермасивна црна дупка функционира како „космичка правосмукалка со бесконечен капацитет“ и голта сѐ што ќе ѝ се најде на патот благодарение на нејзиното моќно гравитациско поле.
„Ништо, дури ни светлината, не е доволно брзо за да ѝ побегне на гравитацијата на црната дупка откако ќе помине одредена граница, позната како „краен хоризонт“.
Со оглед на тоа дека црните дупки се милиони или милијарди пати поголеми од Сонцето, тој хоризонт би можело да се протега на милијарди километри, објаснува Пакучи.
Тој тврди дека ако масивна црна дупка помине покрај Нептун, тоа значително би влијаело на орбитата на Земјата, што би имало „катастрофални последици“.
Сепак, ваквиот вид на црни дупки не треба да нѐ загрижува премногу со оглед на тоа дека супермасивните црни дупки обично се наоѓаат во центарот на една галаксија.
„Нашиот Сончев систем е во стабилна орбита околу супермасивна црна дупка што е сместена во центарот на Млечниот Пат, на безбедна оддалеченост од 25.000 светлосни години. Но, тоа би можело да се смени. Ако нашата галаксија се судри со друга галаксија, Земјата би се нашла втурната кон центарот на Млечниот Пат, доволно блиску до црната дупка за да може да ја повлече и да ја голтне“, вели Пакучи.
„Се предвидува дека ќе се случи судир со галаксијата Андромеда за 4 милијарди години од сега, што може да биде катастрофално за нашата планета Земја“, додава тој.
Пакучи сепак нагласува дека црните дупки не се само „уништувачи“, туку играат клучна улога во формирањето на галаксии.
