British Airways им наложи на своите пилоти веќе да не им се обраќаат на патниците со зборовите „дами и господа“ затоа што сакаат да бидат родово неутрални.
Промената на политиката беше направена за да се избегне дискриминација на патниците кои не спаѓаат во ниту една од двете категории, како што се децата, како и „да се почитуваат новите општествени норми“.
Портпаролот на British Airways ја потврди веста, нагласувајќи ја посветеноста на компанијата да промовира вклученост и разновидност.
„Посветени сме да направиме сите наши клиенти да се чувствуваат добредојдени додека патуваат со нас“, рече тој.
Некои сметаат дека ова не е добра одлука, па дури и ја сметаат за „напад“ на британскиот национален карактер.
„Ова е напад врз сѐ што сме“, напиша на Twitter Лоренс Фокс, актер и лидер на британската партија Reclaim.
Во јули годинава и Lufthansa избра да биде родово неутрална во воздух и на земја, па веќе нема да ги поздравува патниците во кабината со „Дами и господа“.
