Полското студио соопшти дека работи на римејк на првата игра од трилогијата The Witcher од 2007 година.
Франшизата The Witcher се враќа на своите корени. CD Projekt Red објави дека една од новите игри, покрај новата трилогија, ќе биде и римејк на првата игра од 2007 година. Со кодно име Canis Majoris, римејкот на The Witcher се развива со помош на Unreal Engine 5.
„The Witcher е местото каде што сè започна за нас, за CD Projekt Red “, вели во соопштението Адам Бадовски, раководител на студиото. „Тоа беше првата игра што ја направивме и тоа беше огромен момент за нас. Да се вратиме на тоа место и да ја направиме играта повторно сега изгледа како голема работа, ако не и поголема“.
Римејкот на The Witcher ќе биде развиен од студиото Fool's Theory со помош на ветерани кои работеа на оригиналната игра и под надзор на студиото CD Projekt Red.
Canis Majoris беше спомнат во плановите на студиото за идните игри на почетокот на месецот, кога CD Projekt Red објави дека работи на проширување за Cyberpunk 2077, како и продолжение, но и нова трилогија од игрите The Witcher. Дополнително, девелоперот објави и дека работи на сосема нова игра, за која освен кодното име Project Hadar, не се знае ништо.
Франшизата The Witcher постои од 2007 година и оттогаш се здоби со голема популарност меѓу гејмерите, иако третото издание на играта - Wild Hunt - е насловот каде повеќето гејмери првпат се сретнаа со Гералт. Токму затоа не се сомневаме дека многумина ќе се израдуваат со веста за римејкот, бидејќи наскоро ќе може да видат како започнала авантурата на популарниот лик.
