Ентони Дејвис ќе стане најплатениот играч по сезона во историјата на НБА, откако се согласи на продолжување на договорот со Лос Анџелес Лејкерс. Договорот е вреден 186 милиони долари за дополнителни три години.
Договорот ќе го врзува Дејвис со франшизата од Лос Анџелес до 2028 година по вкупна цена од 270 милиони долари, според агентот на играчот, Рич Пол.
Поточно, до крајот на актуелниот договор и за време на новиот договор во 2028 година, Дејвис ќе заработи 270 милиони долари. На овој начин Лејкерс завршија уште една одлична работа, откако претходно го задржаа и Леброн Џејмс.
Дејвис според новиот договор ќе заработува 62 милиони долари по сезона, што е апсолутен рекорд во НБА.
Минатата сезона имаше просек од 25,9 поени и 12,5 скока за Лејкерс, кои стигнаа до финалето на Западната конференција пред да бидат елиминирани во четири натпревари од идниот НБА шампион Денвер Нагетс.
Ентони Дејвис седум сезони го носеше дресот на Њу Орлеанс Пеликанс, а во 2019 година стана член на Лос Анџелес Лејкерс.
