Дона Д'Ерико многумина ја паметат по улогата во серијата „Baywatch“, а неколку децении по нејзиното емитување, актерката изгледа како да не остарела ниту ден.
Со оглед на тоа што нејзиниот изглед привлекува внимание дури и во шестата деценија од животот, Д'Ерико во интервју за Fox News истакна дека исхраната базирана на растенија е тајната на нејзиниот младешки изглед.
„Искусив многубројни придобивки, како почиста кожа, подобро варење, подобар сон, но тоа не е причината зошто го правам тоа. Го правам тоа заради животните“, и нагласи дека најмногу јаде овошје и зеленчук.
„Сакам да имам залихи од зеленчук, овошје, јаткасти плодови и авокадо“, објасни таа.
Откри и дека сака редовно да јаде во текот на денот наместо да консумира три обилни оброци и дека со овој начин на исхрана се чувствува подобро.
Кога станува збор за нега на кожата, изјави дека користењето крем со заштитен фактор е нејзиниот избор.
„Претходно користев масло за бебиња и се сончав за да потемнам. Престанав да го правам тоа. Цело време имам крема за сончање, без разлика на сезоната. Ако ми се присака малку овеќе боја, употребувам средство за самопотемнување или хидратантен крем во боја. Сакам да се грижам за мојата кожа најдобро што можам и првото нешто што можам да направам е да се сокријам од сонцето“, рече таа.
Актерката неодамна беше критикувана затоа што се снимала во бикини велејќи дека е премногу стара, но Д'Ерико одговори дека ќе прави што сака.
Инаку, таа глумеше во серијата „Baywatch“ од 1996 до 1998 година. Позираше за насловната страница на магазинот Playboy во 1995 година. Беше и водителка на шоуто „Battlebots“. Некои од филмовите во кои имаше улоги се „Intervention“, „Inconceivable“ и „The Making of Plus One“.
