Поради санкциите воведени од ФИФА, УЕФА и ИИХФ компанијата одлучи и од виртуелниот свет да ги суспендира сите тимови кои доаѓат од Русија.
Гигантот во производтсвото на видео-игрици, EA Sports, ги отстрани руските клубови и руската репрезентација од игриците „FIFA 22“ и „NHL 22“.
Ова доаѓа откако претходно УЕФА стави забрана руските тимови да се натпреватруваат во европските купови, што резултираше со исфрлање на московски Спартак од Лига Европа, единствениот преостанат руски клуб во Европа. А, пак ФИФА одлучи да ја суспендира руската репрезентација и да ја исфрли од квалификациите за пласман на Мундијалот во Катар.
„EA Sports покажува солидарност со украинскиот народ и како и многубројните повици од фудбалскиот свет, повикува на мир и прекин на инвазијата врз Украина“, почнува соопштението на EA Sports.
„Во согласност со нашите партнери во ФИФА и УЕФА, EA Sports отпочна процес на отстранување на руската репрезентација и сите руски тимови од EA Sports FIFA производите вклучително: 'FIFA 22', 'FIFA Mobile' и 'FIFA Online'. Воедно, активно ги евалуираме и сите останати промени во нашите игрици“.
И љубителите на хокејот наскоро нема да можат да играат со руските клубови бидејќи отстранувањето ја вклучува и игрицата „NHL 22“ откако Русија доби суспензија и од ИИХФ.
„Согласно суспензијата на ИИФХ за сите руски и белоруски репрезентации и тимови од натпреварувањата на ИИХФ, ќе ги отстрануваме овие тимови од 'NHL 22' во наредните недели. Ние сме со народот на Украина и се приклучуваме кон повикот за мир од целиот свет“.