Популарниот египетски фудбалер Мохамед Салах предизвика лавина критики на социјалните мрежи откако и оваа година сподели фотографија со своето семејство во празнична атмосфера воочи католичкиот Божик. Муслиманските фанови на Салах се незадоволни што нивниот омилен фудбалер прави вакви фотки, па се огласи дури и највисокото исламско тело во Египет за да ја смири ситуацијата.
Профилите на социјалните мрежи каде што е активен Салах деновиве се преплавени со критики поради двете фотографии на кои се појавува тој заедно со сопругата и двете ќерки во новогодишни пижани и пред накитена елка.
Некои од критичарите го нападнаа египетскиот играч со коментари од типот „ваквата фотографија ќе те приближи до Англичаните, но ќе изгубиш многу муслимански фанови од арапскиот свет“, „Доста му се поклонуваш на Западот, ти си пример за муслиманската младина“, а некои дури и го нарекоа „неверник“.
Малку се коментарите кои го поддржуваат или бранат Салах, а дополнително го критикуваа што на ист начин не ги одбележува исламските празници.
Двете фотографии објавени во еден пост собраа речиси 4 милиони лајкови, а Салах ја исклучи опцијата за оставање коментар.
После сета лавина, египетскиот Дар ал-Ифта, највисокото египетско исламско советодавно тело, кое на муслиманите им нуди верско водство и совети преку издавање фатва за секојдневни и современи прашања, го изнесе својот став за потегот на Салах.
„Во шеријатот не постои забрана да им се честита на немуслиманите за нивните празници и тоа не е отстапување од исламот како што велат некои екстремисти. Да им се честитаат празниците на сограѓаните во земјата е дел од добрососедство, возвраќање честитки и соживот, а тоа се благородни човечки принципи кои се бараат во шеријатот и сунизмот, кои се практикувани во житието на Пророкот“, се наведува во соопштението на Дар ал-Ифта.