Славниот фудбалер Дејвид Бекам се поклони пред ковчегот на кралицата Елизабета Втора во Вестминстер Хол, по повеќечасовно чекање во редица.
Поранешната ѕвезда на Манчестер Јунајтед и на Реал Мадрид за Sky News изјави дека им се придружил на илјадниците луѓе во редот кон Вестминстер Хол за да оддаде чест на „посебната“ кралица.
Смртта на Елизабета Втора предизвика наплив на емоции кај дел од нацијата, а луѓето со часови чекаа, многумина и цела ноќ, за да оддадат почест на покојната кралица која почина минатата недела.
„Овој ден секогаш ќе биде тежок ден. Нашите мисли се со семејството. Многу е посебно да се слушнат сите овие приказни од луѓето овде. Најмногу посебен момент за мене беше примањето на Орденот на Британското царство од кралицата кој го добив во 2003 година. Со мене ги поведов баба ми и дедо ми, кои беа големи ројалисти. Имав голема среќа што можев да имам неколку такви моменти во животот на нејзиното величество. Ова е тажен ден, но е ден за паметење“, истакна емотивно Бекам.
Изјави дека чекал од 2 часот наутро, мислејќи дека нема да има гужва. Сепак, чекал повеќе од 12 часа.
Кралицата Елизабета Втора ќе биде погребана во понеделник, во Виндзор. На последното испраќање се очекуваат над 2000 присутни.
