Повторно еруптираше најактивниот вулкан во Европа, а лавата што изби од нова пукнатина тече кон источниот брег на Сицилија.
Според извештаите на медиумите од Италија, лавата тече низ кратери на источниот брег на Сицилија во близина на градовите Месина и Катанија.
Еруптивната пукнатина која неодамна се појави во северниот дел на кратерот наречен Југоисток, од неговиот врв исфрла лава и облаци од пепел и чад.
На планината Етна, на која се наоѓа истоимениот вулкан, често се случуваат ерупции кои се придружени со големи текови на лава. Меѓутоа, во модерното време вулканската активност не ги загрозила жителите на околните места.
Спектакуларни ерупции на вулканот висок 3.330 метри може да се случат неколку пати годишно, а потоа следува исфрлање на лава и пепел високо над медитеранскиот остров Сицилија.
Во минатото овој вулкан предизвикувал големи штети со своите ерупции. Во последните две илјади години се забележани бројни ерупции, од кои најразорна е онаа од 1669 година кога лавата ги проголтала околните села и голем дел од градот Катанија.