Повеќе од 706.000 луѓе во текот на 2019 година добиле државјанство на некоја од земјите на ЕУ, а меѓу „новите Европејци“ приближно секој десетти потекнува од Западен Балкан, покажаа податоците на европската статистичка агенција Евростат.
Најмногу нови државјани во текот на 2019 година добиле Германија, Италија, Франција, Шпанија и Шведска, а повеќето се од Мароко, Албанија и Обединетото Кралство.
Од Западен Балкан, најмногу нови државјани на ЕУ доаѓаат од Албанија (41.703), следуваат Србија (10.297), Косово (8.047), Северна Македонија (7.147) и Босна и Херцеговина (6.977).
Според Евростат, граѓаните на Западен Балкан најчесто аплицирале за германско и италијанско државјанство, како и за државјанство на Франција, Шпанија и Шведска, но и на некои од поранешните југословенски републики.
Во 2019 година, Словенија доби 1.911 нови државјани, претежно од Босна и Херцеговина, Србија и Северна Македонија, а Хрватска 1.121, претежно од Босна и Херцеговина, Косово и Србија.
Како и претходните години, Романците, Полјаците и Италијанците се трите најбројни групи на државјани на ЕУ кои во 2019 година добиле државјанство на друга членка на Унијата.
Стапката на натурализација (бројот на натурализирани во однос на бројот на странци во една земја) е најголема во Шведска - 7%, Романија - 4,7% и Португалија - 4,4%, објави Евростат.
