Facebook продолжува да дава приоритет на забавните видеосодржини по пример на TikTok, најавувајќи дека во април 2023 година ќе ја повлече функцијата Instant Articles што ја воведе во 2015 година.
Instant Articles имаше за цел да им обезбеди на издавачите попривлечен начин да ги презентираат своите написи на Facebook, помагајќи им да го зголемат ангажманот на читателите во апликацијата. Во тоа сценарио, Facebook требаше да им служи на издавачите како додаток на нивните главни страници.
Но, со текот на времето, градењето односи со издавачите стана помалку приоритет бидејќи Meta сè повеќе и повеќе се ориентираше кон видеосодржини.
Извршниот директор на Meta, Марк Закерберг, објави SocialMediaToday, неодамна забележа дека гледањето видеа опфаќа 50% од времето поминато на Facebook, додека Reels е најбрзо растечкиот формат на содржина на Facebook и Instagram, што јасно покажува дека видеото станува најпривлечниот формат на содржина.
„Во моментов помалку од 3% од она што луѓето ширум светот го гледаат на Feed-от на Facebook се објави со линкови до медиумски содржини. Како што рековме претходно годинава, како компанија нема смисла премногу да вложуваме во области што не се во склад со преференците на корисниците“, пренесува Axios.
