Американскиот моден гигант „Michael Kors“ потврди дека ќе го купи италијанскиот моден бренд „Versace“ за 2,1 милијарда долари – потег што ги вознемири фановите на легендарната италијанска модна куќа.
Профилите на социјалните мрежи на креативната директорка и наследничка на модната империја, Донатела Версаче, се преплавени од пораки во кои фановите ја молат да не го продава брендот и укажуваат на тоа дека ваквиот потег ќе ја намали вредноста на поимот „Версаче“.
Донатела застана на чело на модната куќа во 1997 година откако беше убиен брат ѝ, дизајнерот Џани Версаче, кој ја оформи компанијата пред четири децении.
„Versace ќе изгуби многу од својата привлечност ако Kors го купи брендот. Michael Kors е луксузен бренд, но Versace е елеганција и висока класа. Облека и модни додатоци кои зборуваат за тебе. Што ќе стане ако го поседува друг ентитет?“, гласи една од пораките до Донатела.
Карактеристичниот стил на брендот е причината што ѕвезди од различни сфери го сакаат и промовираат со децении. Нема друг бренд што бил позастапен во весниците и списанијата врз основа на тоа дека го носеле познати личности на важни настани.
Клучен момент за Версаче беше кога тогаш непознатата Елизабет Харли се појави во сега веќе славниот црн фустан на италијанскиот дизајнер, како придружничка на мегапопуларниот Хју Грант, на премиерата на филмот Four Weddings and a Funeral. Таблоидите не можеа да престанат да пишуваат за фустанот, а Versace, што до тогаш беше само уште еден италијански моден бренд, стана синоним за „ТОЈ фустан“.
Познати фанови на брендот беа Мајкл Џексон, принцезата Дијана и Елтон Џон, а од поновите генерации ѕвезди Ники Минаж, семејството Бекам, како и сестрите Кардашијан и Џенер.