Неутешен беше Нејмар по вчерашниот пораз во Лисабон, кога титулата европски првак му се лизна низ прсти.
Фудбалерите на минхенски Баерн славеа во финалниот натпревар од Лигата на шампиони против ПСЖ во Лисабон и со резултат од 0:1 станаа шампиони на Европа.
Откако Италијанецот Даниеле Орсато го свирна крајот на натпреварот, фудбалерите на Баерн почнаа со славје, а само Давид Алаба го тешеше расплаканиот Нејмар.
Се чини дека поразот му падна многу тешко на најскапиот фудбалер на светот кој беше убеден дека трофејот конечно ќе дојде во неговите раце.
Сакајќи да биде колегијален, Бразилецот упати благодарност до навивачите и честитка за победата на противникот, но очигледно уште збунет и во неверување, му честиташе на погрешен германски клуб, Баер од Леверкузен чие име од минхенскиот тим се разликува по буквата Н на крајот.
„Поразот е дел од спортот, се обидовме со сѐ, се боревме до крај. Ви благодарам за поддршката и за љубовта на секој од вас и ЧЕСТИТКИ до БАЕР“, напиша Нејмар на Twitter.
Како поразот да не беше доволен, овој фејл на Нејмар беше заокружен со „благодарност“ од Леверкузен:
„Фала Нејмар. Не сме сигурни зошто ни честиташ, ние сме на одмор, играме „FIFA“. Ама фала ти“.