На денешната прес-конференција, министерот за здравство Венко Филипче извести за состојбата со COVID-19 во земјава.
Од 661 тестирање, има 52 новозаболени со COVID-19 во изминатите 24 часа во земјава, потврди Филипче.
По градови, во Скопје има 26, Куманово 6, Штип 7, Тетово 9, Струга 1 и по еден во Велес и Кочани.
Има четворица починати пациенти – на Инфективната клиника скопјанец на 73 години, примен на 21 мај, и 83-годишен од Велес хоспитализиран на 22 мај. Двајца починаа и во болницата „8 Септември“ – 76-годишна пациентка од Скопје, примена на 21 мај, и 55-годишна која завчера била примена во болницата.
Оздравени пациенти во изминатите 24 часа се 30 – 16 во Скопје, 10 во Тетово, двајца во Охрид и по еден во Велес и Кратово.
Досега вкупно дијагностицирани има 2.129, оздравени 1.516, починати 126 и активни 487 случаи.
Досега се направени 27.684 тестови, од кои од скрининг се 3.015. Има пет позитивни случаи од скринингот - 4 од градинки во Скопје, Битола и Тетово и 1 од геронтолошка институција.
Процентот на заразени во изминатите 14 дена изнесува 5,5%, вклучувајќи ги тестовите од скринигот, а капацитетот на болниците е исполнет 11%. Здравствениот систем е во добра кондиција. Има над 92% оздравени здравствени работници.
Инциденцата во изминатите 14 дена е 10,3% , три пати поомала во однос на пикот во април. Има 15 градови во кои биле регистрирани болни, а повеќе немаат заразени (Дебар, Кавадарци, Гевгелија, Крива Паланка, Радовиш, Крушево, Кочани, Пробиштип, Демир Хисар, Македонски Брод, Пехчево, Берово, Валандово, Делчево и Кратово), а во шест града има до пет активни случаи (Струмица, Виница, Кичево, Свети Николе, Гостивар и Неготино).
Зголемениот број на случаи е од познати кластери, но има и некои нови. Филипче нагласи дека загрижуваат информациите за непочитување на мерките за самоизолација и заштита. По извршените надзори во Тетово е утврдено дека не се почитуваат мерките за самоизолација и за заштита, а во Штип не се почитувале правилата за транспорт, особено во конфекциите.
Филипче нагласи дека голем проблем е одбивањето на соработка со здравствените работници и епидемиолозите кои имаат потешкотии за спроведување на епидемиолошките анкети – некои пациенти даваат лажни информации и адреси, па тешко е да се достават решенијата за самоизолација.
Зголемена е концентрацијата на заболени во скопските населби Чаир, Гази Баба, Бутел и Аеродром, поради непочитување на мерките за самоизолација и заштита. Има и заразени кои се инфицирале кога имаше строги мерки за движење, а загрижуваат информациите за граѓани кои со решенија за самоизолација се шетаат надвор.
Филипче најави дека можни се таргетирани рестрикции согласно бројот на нови случаи, што и се дискутирало на денешната средба на Комисијата за заразни болести.
Прес-конференцијата е во тек и Филипче одговара на новинарски прашања.