Тренерот на Баерн откри дека клубот нема да се засилува зимава поради финансиската криза предизвикана од пандемијата.
Ханси Флик јавно соопшти дека минхенски Баерн овој преоден рок нема да се засилува, а најави дека е можно еден до двајца играчи и да си заминат.
„Дозволете ми да ви кажам јасно и гласно: моменталната ситуација ги погодува сите клубови во светот. Не е лесно со коронава. Сакам да бидам јасен: Немам намера да барам нови играчи. Ја знам ситуацијата во Баерн; знам дека е прилично тешка во моментов“, рече Флик.
„Тимот кој го имаме на располагање е оној кој ќе го имаме и до крајот на сезоната“, потврди тој, ставајќи крај на сите шпекулации кои поврзуваа разни играчи со баварскиот гигант.
Затоа, пак, додаде дека постои веројатност еден или двајца играчи да си заминат, а со тоа да се олесни и клупскиот буџет.
„Не сум сигурен дали еден или двајца ќе си заминат. Има одредени работи за кои се разговараше, но моментално имаме навистина добар квалитет во нашиот тим и не верувам дека нашите потцртани цели се загрозени“, изјави Флик без да соопштува имиња.
Баерн вечерва од 20:30 часот игра дерби натпревар со Борусија на гости во Менхенгладбах во обид и по 15. коло да ја задржи лидерската позиција на табелата.