На Ромелу Лукаку не само што му недостига играњето во Интер, туку му недостига и животот во Милано - комбинација клучна за неуспехот во Челси.
Најтиражниот италијански дневен весник La Gazzetta dello Sport пишува дека белгискиот голгетер има проблем и со животот во Лондон и тоа е дел од причината за неговата лоша форма.
Сезонава на 28 натпревари 28-годишниот Лукаку има постигнато само 10 гола, со што потфрли во обидот да ги оправда 113-те милиони евра кои Челси му ги исплати на Интер за неговите услуги.
Самиот Лукаку имаше желба да се врати во Челси каде што порано имаше неуспешна авантура. Сметаше дека одличната голгетерска форма од Интер ќе ја пренесе и таму и ќе покаже дека претходно „Сините“ неоправдано се откажале од неговите услуги. Но, очигледно тоа тешко дека ќе се оствари. Воедно, понудата за плата во Челси беше далеку над онаа која италијанскиот шампион можеше да му ја понуди.
Лукаку неодамна им се извини на навивачите на Интер за начинот на кој си замина и нагласи дека сака повторно да се врати во Милано. Тоа интервју потоа предизвика лавина негативни рекации на Островот, па Белгиецот беше и времено тргнат од составот.
Шпекулациите велат дека Лукаку уште летово би се вратил во Интер, но желбите се едно, а можностите друго. Интер финансиски не може да си дозволи таков трансфер, дури и Лукаку да се согласи на драстично намалување на платата.
La Gazzetta dello Sport пишува дека на Лукаку му недостасува и животот во Милано и затоа сѐ уште ги чува двата стана кои таму ги поседува.
„Лондон е многу поинаков. Таму никој не го застанува на улица за од срце да го поздрави. Во Милано таквото охрабрување беше секојдневие. Тој беше третиран како крал, што му даваше енергија на теренот“, пишува весникот со розеви страници.