Германската централна банка (Бундесбанк) денеска предложи старосната граница за пензионирање да се прилагоди на просечниот животен век во Германија.
„Поврзувањето на пензионирањето со просечниот животен век може да го стабилизира пензискиот систем на долг рок“, се вели во денешниот месечен извештај на Германската централна банка. Во него се наведува дека многу земји во Европската Унија, во меѓувреме, го приспособиле моделот на пензионирање на таков механизам.
„Поврзувањето на моментот на пензионирање со просечниот животен век значително го намалува притисокот и врз нивото на пензиското осигурување и врз државниот буџет“, вели во извештајот економистот на Централната банка.
Границата би требало да биде 67 години до 2031 година
Со тоа, се наведува понатаму, би се елиминирала вечната дебата за изнаоѓање на уште нови модели за одредување на старосната граница за пензионирање.
Возраста за пензионирање постепено се зголемува од 2012 година и треба да се помести на 67 години до 2031 година.
Партиите од актуелната владејачка Социјалдемократско-зелено-либерална коалиција се договорија да го замрзнат износот на пензијата на 48 отсто од последната плата. Коалицијата исклучува и зголемување на старосната граница за пензионирање.
Сегашниот просечен животен век за жените во Германија е 83,4, а за мажите 78,6 години.