Шок и неверување провејува во извештаите на германските медиуми по елиминацијата на националниот тим од Светското првенство во Катар, а дел од вината му ја придаваат на селекторот Ханси Флик.
По многу мака, Германците ја совладаа Костарика со 4:2, но Јапонците (не)очекувано ја победија Шпанија, па овие две селекции се пласираа понатаму.
Германските медиуми не обрнаа внимание на резултатите на другите селекции, туку пишуваа за срамот на нивната репрезентација во Катар.
Германија го заврши настапот на Мундијалот како третопласирана во групата Е зад Јапонија и Шпанија, и покрај вчерашната победа над Костарика (4-2).
„Каква срамота! Елиминирани сме“, објави на насловната страница најтиражниот германски весник „Билд“, потсетувајќи дека Германија втор Мундијал по ред не ја мина групната фаза.
„Срамно загубивме од Јапонија, одигравме нерешено против Шпанија и потоа ја победивме Костарика“, пренесе „Билд“.
„Готово е, готово. Германија испадна од СП“, пренесе „Спорт1“, додека „Кикер“ наведе дека елиминацијата ги шокирала избраниците на Флик.
„Дојче веле“ истакна дека ова било горко СП за Германија.
„Победата на Германија над Костарика остана бесмислена“, наведе „Дојче веле“.
Според други, главен виновник за елиминацијата на Германија е селекторот Флик.
„Совршена бламажа – германската репрезентација се враќа дома. По втор пат од 2014 година Германците испаднаа во групната фаза на СП“, пренесоа германските медиуми.
