Манчестер Јунајтед конечно премина во рацете на катарскиот милијардер откако англиските медиуми утринава го објавија датумот на купување на клубот.
Познатиот англиски клуб е на продажба од ноември минатата година кога семејството Глејзер по долгогодишни протести на навивачите реши да се откаже и да го стави клубот на продажба. Тие тогаш рекоа дека бараат стратешки алтернативи за ново раководство на клубот.
Од тој момент најголемата борба се водеше меѓу најбогатиот Британец, Џим Ретклиф, и катарскиот милијардер, шеикот Џасим. Претходните сопственици од американското семејство Глејзер го „поддржуваа“ Ретклиф, бидејќи во тој случај и тие ќе задржеа дел од акциите.
Сепак, шеикот Џасим ја доби оваа жестока битка и катарската држава ќе го води Манчестер Јунајтед во наредните години, што би можело да го изедначи клубот со градскиот ривал Манчестер Сити.
Утринава во пишувањата на англиските медиуми се наведува дека датумот за официјална продажба на Манчестер Јунајтед е одреден за средината на октомври. Шеикот Џасим ќе одвои неверојатни 7,05 милијарди евра за купување на Јунајтед.
Така, семејството Глејзер ќе оствари неверојатен профит од Манчестер Јунајтед. Да потсетиме, американските бизнисмени во 2005 година на Јунајтед му платија помалку од милијарда евра, а сега ќе го продадат за повеќе од 7 милијарди.
