Грчката православна црква се побуни против наредбата на Владата да затворат црквите на една недела поради пандемијата на COVID-19, објави balkans.aljazeera.net.
Грчката православна црква се побуни против наредбата на Владата да ги затвори црквите на една недела поради пандемијата и им нареди на свештениците да ги пуштаат верниците во верските објекти на Богојавление.
Грчката Влада донесе одлука дека една недела пред отворањето на училиштата, од 3 до 10 јануари, ќе стапат на сила построги ограничувања со цел сузбивање на коронавирусот, што вклучуваат и затворање на црквите за верниците.
Сепак, Светиот синод на влијателната Грчка православна црква вчера соопшти дека „не ги прифаќа“ новите ограничувања и ќе испрати протесно писмо до централно-десничарската Влада.
По скокот на бројот на нови инфекции и смртни случаи од коронавирусот во Грција во ноември, кога беа пополнети одделенијата за интензивна нега, властите по вторпат воведоа сериозни ограничувања на движењето, поради што беа затворени училиштата и прекинати беа повеќето економски активности.
Мерките беа делумно олеснети пред Божик, кој Грците го слават на 25 декември, кога на црквите, продавниците што не продаваат најнеопходна стока и на фризерниците им беше дозволено да продолжат со некои активности со одредени ограничувања.
Сепак, во пресрет на отворањето на училиштата на 11 јануари, по два месеци, повторно се на сила претходните поостри мерки.
На свештениците им е дозволено да ја извршуваат верската служба за Богојавление, но без присуство на верници.
Синодот изјави дека Владата треба да се придржува до поблагите ограничувања што беа во сила за време на Божик, донесени по преговорите со Црквата, бидејќи свештенството се грижеше за време на празниците да се почитуваат сите договорени мерки.