Гвардиола криптичен: Ги предупреди навивачите и најави лоши времиња

Менаџерот на Манчестер Сити, Пеп Гвардиола, испрати предупредување и молба до навивачите на неговиот клуб бидејќи најавува лоши времиња на „Етихад“.

Гвардиола успеа да испише историја со Манчестер Сити со освојувањето на тројната круна минатата сезона, трите најголеми натпреварувања во кои клубот играл (Лига на шампиони, Премиер лига и ФА Куп). Тоа во историјата успеа да го направи само нивниот ривал Манчестер Јунајтед.

Сега шпанскиот стручњак најавува доаѓање на потешки времиња. Тој рече дека „не е нормално да се освојуваат толку трофеи“, а упати предупредување до навивачите.

„Освоивме многу, а во иднина треба да разберете дека тоа беше исклучок. Не е нормално да се освојуваат тројни круни, пет титули во Премиерлигата за шест години... Продолжете да уживате, но кога се лоши времиња дојдете оваа или следната сезона, мора да бидете со нас“, им порача искрениот Гвардиола на своите фанови.

Оваа вест доаѓа неколку дена откако беше закажано „судењето на векот“ во светот на фудбалот, како што го опишаа англиските медиуми. Манчестер Сити ќе оди на суд по 115 точки од обвинението за кршење на финансискиот фер-плеј (ФФП).

Двете страни се договорија за датум за појавување на Сити на суд, што ќе се случи есента 2024 година. Дали ова се лошите времиња кои ги споменува Гвардиола, останува да видиме.