Златан Ибрахимовиќ го чека својот гол број 500 на клупски план, а наредни противници му се три клуба против кои никогаш не погодил.
Кротоне, Специја па Црвена звезда - тоа се наредните три противници на Милан во Серија А и Лига Европа. Против овие три клуба Златан никогаш во својата долга кариера нема постигнато гол. Сега е на бројката од 499 голови на клупски план во сите официјални натпревари, па се бара среќниот клуб против кој ќе го прослави јубилејот.
Швеѓанецот досега има играно против околу 250 екипи, а на повеќето од нив и им ги затресол мрежите. Импресионантна бројка, нема што. Но, Кротоне и Специја ја немаат таа чест да бидат на листата на клубови од Серија А на кои Ибра им дал гол.
Ибрахимовиќ најмногу натпревари одиграл против Рома, дури 20. А, пак, вистински кошмар е кога се појави на теренот на натпревар против Сент Етјен, клуб на кој му забил 17 голови. По овој француски клуб следуваат Рома и Палермо на кои им дал по 12 голови, потоа Марсеј и Ница по 11, Интер, Парма и Бастија по 10.
И во репрезентацијата беше ефективен. На 116 натпревари има постигнато 62 гола, а најмногу страдала Малта на која ѝ има дадено 6 голови. Ако некој рече дека Малта е слаба, тогаш еве друг податок - на Англија ѝ има дадено 5.
Но, има клубови и репрезентации против кои на Ибра едноставно не му оди. Во 4 натпревари против Ирска и Латвија не успеал никогаш да постигне гол, додека на клупски план 3 натпревари одиграл против Тотенхем и Селтик и никогаш не погодил. На својот сегашен клуб Милан му има дадено 2 гола, но дури од 12 натпревари.
