Легендарниот Златан Ибрахимовиќ се прости од фудбалот во последното коло од Серија А на крајот на мај, но изгледа како веќе да му здосади пензијата.
Изминатава сезона ретко играше за Милан бидејќи го мачеа повреди, а ни на простувањето не заигра, туку само излезе на теренот со едно емотивно обраќање кон навивачите објавувајќи дека се повлекува.
Сега, еден месец откако е во заслужена пензија, почна да најавува враќање во фудбалот.
„Не се брзам, ќе видиме што ќе се случи. Поминаа само три недели откако се пензионирав. Можеби ќе се вратам на терен... Можеби за неколку месеци повторно ќе бидам во тренинг-центарот на Милан. Благодарен сум им на сите што сакаат да ме видат во Милано, макар и како тренер“, изјави Ибрахимовиќ за Calciomercato.
Ибра за Милан играше 5 и пол години, одигра 169 натпревари, постигна 93 гола и исвои две Скудета и еден домашен Суперкуп.
Кариерата ја почна во Малме, а потоа преку Ајакс направи кариера во Јувентус, Интер, Барселона, Манчестер Јунајтед, ПСЖ и Лос Анџелес Галакси. Лигашки титули има и со Ајакс, Јуве, Интер, Барса и ПСЖ. Со Јунајтед ја освои Лига Европа.