Поранешниот селектор на македонската фудбалска репрезентација има нов ангажман и тоа во далечниот Казахстан.
Игор Ангеловски ќе го води тимот на Каспиј, објави неговиот нов клуб. Станува збор за моментално последнопласираниот тим во најдобрата лига на Казахстан.
По разделбата со ФФМ летото 2021 година, Ангеловски е слабо активен во тренерските води. На крајот на август 2022 година седна на клупата на хрватскиот тим Горица, но поради слаби резултати дојде до разделба веќе на почетокот од ноември. Оттогаш беше без ангажман.
Неговиот нов клуб Каспиј има лош почеток на сезоната (во Казахстан сезоната почнува во март) и по 6 кола е последен со само една победа и 5 порази. Поради тоа клубот се раздели со досегашниот предводник, бугарскиот стратег Николај Костов. Без Бугаринот викендов Каспиј ја запиша првата победа, а ги предводеше домашен в.д. тренер.
Ангеловски првиот предизвик ќе го има в среда кога во рамките на Казахстанскиот куп Каспиј ќе го пречека Туран.
Клубот Каспиј е од градот Актау на бреговите на Каспиското Море, по кое клубот е именуван (во минатото често менувал имиња). Дел од тимот е и македонскиот десен бек Стефан Коцев, кој сега ќе соработува со Ангеловски и кој во јануари од штипска Брегалница дојде во Казахстан.