Мадридски AS тврди дека Рафаел Варан сака да си замине од Реал Мадрид на крајот на сезоната.
Тоа би бил голем удар за тимот од Мадрид бидејќи Варан е еден од клучните играчи и фудбалер кој треба да биде предводник на одбраната по заминувањето на Серхио Рамос. Договорот на Варан со шпанскиот шампион трае до 2022 година и не планира да го продолжи.
Ова не е прв пат Варан да сака да го напушти Реал. Тој исто така планираше да замине во 2019 година, но враќањето на тренерот Зинедин Зидан го принуди да се предомисли. Сепак, сега должината на неговиот договор му овозможува поповолна ситуација во преговорите со Реал за заминување затоа што следната година може да го напушти Мадрид бесплатно.
Реал е во тешка ситуација бидејќи проблем за 27-годишниот Варан не се парите - тој сака нови предизвици. Неговата цел е да се испроба во англиската лига по десет години во Реал. Манчестер Јунајтед сакаше да го донесе таму пред две години, но Мадрид не сакаше да го продаде ни за 100 милиони евра.
„Варан вреди 500 милиони евра“, беше пораката од Реал во тоа време.
Сега ќе треба да прифатат многу помала понуда од 100 милиони евра...
