Италијанско-шпанска пресметка в петок во Лига Европа. Таков е епилогот по вчерашното второ полуфинале во кое Интер го декласираше украински Шахтар со високи 5:0.
Многу полесно од очекувањата тимот на Антонио Конте стигна до своето прво финале по она во 2010 година кога ја освои Лигата на шампиони.
Резултатот го отвори Лаутаро Мартинес во 19. минута. По едно лошо исфрлување на голманот Андриј Пјатов, Николò Барела ја украде топката, се протна до позиција за нафрлување, го пронајде Лаутаро во шестнаесетникот каде Аргентинецот со глава постигна гол.
На вториот гол се чекаше после паузата, до 64. минута. Марцело Брозовиќ од корнер прецизно му сервираше на Данило Д'Амброзио и „Нераѕурите“ по вторпат погодија со глава.
Потоа во интервал од 11 минути тотално се распадна концепцијата на Украинците кои примија уште три гола за вистинско полуфинално понижување. Во 74. минута Лаутаро го постигна својот втор гол, во 78. Аргентинецот си поигра со украинската одбрана и одлично му асистираше на Ромелу Лукаку за 4:0, а во 84. минута Лукаку со неверојатен спринт се проби до голот и низ нозете на Пјатов ги постави конечните 5:0.
Финалето е закажано за в петок со почеток од 21 часот на „РајнЕнерги“ стадионот во Келн. Нормално, ќе се игра без публика. За Севиља тоа ќе биде рекордно шесто финале во ова натпреварување кое порано се викаше Куп на УЕФА, додека за Интер ќе биде петто. Андалузијците ја немаат почувствувано горчината на поразот во финале бидејќи досега сите пет ги победија, додека Интер има три триумфи и еден пораз.