После 15 натпревари во лигата без пораз, одличната форма која му ја донесе првата позиција на табелата, Интер во 16 коло од Серија А се наоѓа пред најтешкиот испит, а тоа е гостувањето кај Јувентус.
Големото дерби познато под прекарот Derby d’Italia на програмата е вечерва со почеток од 20:45 часот во Торино.
Ако од почетокот на сезоната 2010/11, првата сезона на Интер после заминувањето на Жозе Мурињо, кој зад себе остави тројна круна, дербито меѓу Јуве и Интер беше интересно најмногу поради величината на клубовите, а не и поради рамноправната силa и форма, тоа нема да биде случај во вечерашното дерби.
Овие две екипи, а тоа посебно се однесува на Интер, конечно после долг временски период заедно се борат за титулата и тоа ја враќа убавината на италијанскиот фудбал.
Интер со својата фантастична низа од 15 натпревари без пораз во 15 лигашки натпревари, во кои запиша 12 победи и три ремија, е прв на табелата, а на своето конто има 39 поени.
Јувентус во лигата веќе два пати ја почувствува горчината на поразот, еднаш ремизираше и 12 пати славеше, што е доволно за 37 поени и трето место на табелата.
Интер во последните три натпревари запиша три победи, притоа постигна и 10 погодоци, а прими само еден, што најдобро отсликува во каква форма се наоѓа тимот на Спалети.
Иако „Старата дама“ нема таков учинок во последните три лигашки средби, нејзината сила, па и форма, најдобро ја прикажува резултатот од последното коло во кое беше срушен Наполи со 1:0.
Нема сомнение дека не очекува вистински спектакл вечерва во Торино и конечно љубителите на фудбалот и Серија А, како што стојат работите оваа година ќе можат да уживаат во возбудлива трка за титулата.