Милан е подготвен да го продаде хрватскиот офанзивец Анте Ребиќ (28), но не за помалку од 20 милиони евра, објавија италијанските медиуми.
Ребиќ пристигна во Милан во септември 2019 година на позајмица од Ајнтрахт, а една година подоцна „Росонерите“ го откупија неговиот договор.
Поранешниот хрватски репрезентативец импресионираше со своите игри и во првите две сезони постигна 23 гола.
Сепак, следеа повреди и лоши игри и во минатата сезона, во која Милан ја освои титулата, тој постигна само три гола во сите натпреварувања. Италијанските медиуми наведуваат дека доаѓањето на Дивок Ориги е знак дека Милан е подготвен да го продаде Ребиќ, но не за помалку од 20 милиони евра.
Пред да дојде во Милан, Ребиќ играше за Ајнтрахт, Верона, РБ Лајпциг, Фиорентина и Сплит. За хрватската репрезентација забележа 42 настапи, постигна три гола и беше важен играч за освојување на второто место на Светското првенство 2018 година.
Последниот натпревар во репрезентативниот дрес го одигра на ЕП 2020 против Шпанија во осминафиналето. Тој по поразот од „Фуријата“ го критикуваше селекторот Златко Далиќ кој повеќе не го кани во репрезентацијата.
