Израел досега потроши околу 785 милиони долари на вакцини против COVID-19, изјави денеска официјален претставник на Министерството за финансии на седница на парламентарниот комитет, пренесе DPA.
Израел досега има купено вкупно 15 милиони дози вакцини, иако портпаролот на Министерството за здравство одби да ја потврди оваа бројка, повикувајќи се на договорите за доверливост.
Израелските власти потрошија околу 2,6 милијарди шекели за купување вакцини од неколку производители, се слушна пред парламентарниот комитет. Оваа земја досега користеше речиси исклучиво вакцини на Pfizer/BioNTech.
Цената на вакцината во просек беше околу 52 долари по доза, далеку повеќе од сумата што ја платија многу европски земји.
Пред неколку недели, белгиската државна секретарка за буџет, Ева Де Бликер, случајно на Twitter објави некои цени на вакцините, наведувајќи дека доза на вакцината на Moderna чини околу 15 евра (17 долари), додека на Pfizer/BioNTech чини 12 евра. Таа подоцна го избриша твитот.
Претставник на израелското Министерство за здравство соопшти дека уште 2,5 милијарди шекели ќе бидат потрошени за дополнителни дози на вакцини.
Израел, држава со околу 9 милиони жители, националната кампања за вакцинација ја почна на 19 декември и таа досега е една од најуспешните во светот, пренесе DPA.
Бројот на сериозно заболени лица значително се намали во последните неколку недели, како и бројот на нови случаи.
Повеќе од 5,2 милиони Израелци досега ја примиле првата доза од вакцината, а 4,3 милиони ја примиле и втората доза.