Во бекстејџот на доделувањето на Златната топка во Париз беше видена многу интересна сцена, а главната улога ја имаше Новак Ѓоковиќ.
Меѓу бројните гости беше и најдобриот светски тенисер Новак Ѓоковиќ, кој ја додели Златната топка во женска конкуренција на Ајтана Бонмати.
Јутјуберот IShowSpeed налета на Ѓоковиќ зад сцената и настана незаборавна сцена.
IShowSpeed, или 18-годишниот Американец Дарен Воткинс, му пријде на Ѓоковиќ и го праша кој е тој.
„Како се викаш? Ми изгледаш многу познато“, го праша IShowSpeed.
Ѓоковиќ го препозна јутјуберот и се снајде на генијален начин.
„Јас сум новата ѕвезда на Милан“, рече освојувачот на 24 Грен слем титули и додаде:
„Сѐ уште не сум заиграл за тимот, но ќе бидам на следниот натпревар. Сакам да постигнам хет-трик“, а тој одговор го воодушеви американскиот тинејџер.
Ѓоковиќ реагираше на таков начин бидејќи очигледно е запознаен со ликот и делото на IShowSpeed.
Младиот Американец, кој има 21 милион следбеници на YouTube, е познат по тоа што намерно лошо ги изговара имињата на фудбалерите додека ја игра популарната видео игрица „FIFA“, или сега „EA FC“, а преправањето дека не знае кој е Ѓоковиќ беше само дел од неговиот настап.