Американската Федерална авијациска управа (ФАА) му ја одзеде пилотската дозвола на јутјуберот Тревор Џејкоб откако откри дека скокнал од авион и намерно дозволил да се урне за да може да го сними инцидентот.
Џејкоб, поранешен американски олимписки сноубордер и инфлуенсер, предизвика контроверзии откако минатиот декември објави видео со наслов „I Crashed My Plane“.
Наведувајќи дефект на моторот како причина, Џејкоб скокна со падобран од малото летало и го сними како паѓа во подножјето на Националната шума „Лос Падрес“ во Калифорнија.
Во писмото од 11 април, ФАА соопшти дека ги прекршил правилата на воздухопловната агенција и дека управувал со својот едномоторен авион на „невнимателен или непромислен начин со што го загрозил животот или имотот на трети лица“, пишува The New York Times.
„Покажавте недостаток на внимание, расудување и одговорност со тоа што избравте да скокнете од авионот само за да можете да снимите видео од несреќата“, се вели во писмото.
„Вашите неверојатни и намерни постапки покажуваат дека моментално ви недостасува степен на внимание, расудување и одговорност што се бара од носителот на сертификатот“, додава ФАА.
Агенцијата додава и дека тој ја отворил пилотската врата за време на летот без да открие дека моторот откажал и дека не се мачел да контактира со контролата на летање преку фреквенцијата за итни случаи.
Скоро 13-минутното видео на YouTube, објавено на Бадник, досега има над 2 милиона прегледи.
Воздухопловните експерти и корисниците на социјалните мрежи се сомневаа дали авионот намерно се урнал, поради што ФАА и Националниот одбор за безбедност при транспорт (НТСБ) започнаа заедничка истрага.
Видеото, направено со помош на GoPro камери прикачени на различни делови од едномоторниот авион Taylorcraft BL65, покажува како леталото ја губи моќта во воздухот.
„Во текот на летот доживеав дефект на моторот над некои планини. Немаше безбедно место за слетување“, вели Џејкоб во видеото.
„Затоа секогаш летам со падобран“, додаде тој по падот на авионот, додека се враќаше кон урнатиот авион.
Јутјуберот ги исклучи коментарите на видеото откако корисниците го прашаа дали тој ја организирал несреќата, но шотоа, по одредено време, повторно ги дозволи.
