Се сеќавате ли на седумгодишното девојче од Алепо, Сирија кое доби неверојатен подарок од писателката Џ.К. Роулинг? Девојчето досега многупати успеа да го привлече вниманието на Twitter, објавувајќи ги ужасите што се случуваат во нејзината земја.
Twitter профилот на Бана стана гласот на многуте цивили заробени во источниот дел на Алепо, кој е под контрола на бунтовниците и под напади на сириската војска. И додека некои сочувствуваат со девојчето и останатите цивили, многумина се скептични за автентичноста на профилот.
Тоа што треба да се знае за Бана е дека има многу голема помош од мајка ѝ, која е професорка по англиски јазик. Новинарката Кетлин Гибсон од Washington Post ја нарече Бана сириската Ана Франк. Минаа повеќе од 70 години кога Ана Франк водела хронолошки дневник за животот на нејзиното семејство, додека се криеле од нацистите. Денес, приказната за Сирија ја дознаваме преку очите на 7-годишно девојче.
Но, шпекулациите за малечката Бана беа премногу раширени на интернет, а британската интернет страница Bellingcat, специјализирана за истражувачко новинарство, го провери профилот на Бана. Ник Волтерс и Тим Ален вчера ги објавија резултатите за автентичноста на профилот и велат дека видеата објавени на Twitter ја покажуваат околината на источниот дел на Алепо, дека објавите на профилот ги пишува мајката, која е професорка по англиски јази, а нивната куќа има соларни панели со чија помош ги полнат телефоните. Преку сателит тие успеале да најдат фотографии што докажуваат дека навистина куќата на Бана била бомбардирана на 27 ноември.
„Најверојатно е дека профилот @AlabedBana го води Фатима, мајката на Бана, која раскажува за својата ќерка и нејзиниот живот во Алепо“, заклучуваат истражувачите.
Профилот на Бана го следат над 303.000 луѓе и е верификуван, што значи дека Twitter претходно утврдил дека сопствениот на профилот е автентичен.