Милиони луѓе секојдневно патуваат на работа седејќи во автомобил или во јавен превоз, доаѓаат во канцеларија и седат пред компјутер. Така минуваат часови и часови во седење, за по работното време си заминат дома со истото превозно средство, седнат и така се одморат од работа.
Од почетокот на пандемијата се повеќе луѓе работат од дома, што дополнително ја намалува количината на движење на личноста. Повеќето не се ни свесни колку таквиот стил на живеење може да наштети на нивното здравје.
Според студија објавена во Journal of Physical Activity and Health., возрасните во просек минуваат 9 часа седејќи додека се будни, а околу 4.5% од нив пријавиле тешкотии во извршување на секојдневните животни активности.
Околу 50% од животот на просечниот човек вклучува седечки активности, според студија објавена во Annals of Internal Medicine во 2015 година. Откриено е дека долготрајното седење го зголемува ризикот од болести на срцето, дијабетес, рак и смрт, без разлика дали вежбате редовно или не.
Експертите велат дека е добро да станувате на секои 30 минути и малку да прошетате наоколу, па дури и кратко да се истегнете или качувате по скали.
Ова исто така ќе ве принуди да престанете да гледате во компјутер, што може да доведе до напрегање на очите.
Долготрајното седење може да доведе до лошо држење на телото што може да предизвика болка во грбот и колковите, а тоа го зголемува ризикот од остеопороза.