Во текот на следните неколку дена, Месечината ќе биде најсветла и ќе изгеда најголема во последните 70 години. Ако сте вљубеник во фотографијата и сакате да го документирате овој интересен феномен, ќе треба да следите неколку едноставни правила.
За почеток ќе ви треба соодветна опрема, односно апарат со објектив кој ќе ви овозможи доволно да зумирате. Препорачливо е да се користи барем 200 милиметарски објектив, да се фотографира од статив и потоа, ако е потребно, да се кропира фотографијата за да се извади максимумот од сцената.
За да ги добиете најдобрите резултати, потребно е да се фотографира пред да настане комплетна теминца, да се користи мануелна експозиција, како и да се вклучи некој друг елемент во фотографијата. Исто така важно е да се фотографира кога изгрева или заоѓа бидејќи тогаш ќе изгледа најголема.
Со оглед на тоа дека големите теле-објективи може да бидат многу скапи, супер-зум компактните фотоапарати можеби се најпрактичниот начин за да се направи фотографија од Месечината.
Ако планирате деновиве да правите вакви фотографии, важно е да знаете дека Месечината изгрева околу 16.30 часот, а заоѓа околу 5.45 наутро, а овие два периоди се најдобрите моменти за да се фотографира. Секако, важно е да имате и чисто небо без облаци за убаво да ја видите Супер Месечината.
