Една од највпечатливите фотографии од Африка е онаа на која хуманитарка му дава вода на гладното мало момче кое едвај стои на нозе.
Данкињата Ања Рингрен Ловен спаси момче обвинето за вештерство, кое родителите го оставиле на улица да умре од глад и жед.
Детето, кое потоа го доби името Хоуп (на англиски значи надеж), преживеало јадејќи ѓубре и остатоци наоѓајќи ги на улица и било во ужасна состојба.
Ања му дала храна и вода, го завиткала во ќебе и го однела на лекување во болница. Два дена откако ги замолила луѓето преку интернет да помогнат со сметката за лекување на Хоуп, таа добила 2 милиони долари донации од целиот свет.
Ања и нејзиниот сопруг ја основале фондацијата Land of Hope во Нигерија за сите деца кои ги нарекуваат вештерки, поради што се оставани на улица, физички малтретирани, а некои и убиени во руралните области на таа земја.
Ања неодамна сподели нова слика од Хоуп на која се гледа здраво и насмеано момче.
„По спасувањето на Хоуп во 2016 година бев интервјуирана од медиумите ширум светот и оттогаш приказната за неговиот напредок е објавена во многу написи. Децата сè уште се стигматизирани, мачени и убивани. Законите што треба да ги заштитат децата не се спроведени, а бројот на деца обвинети дека се вештерки расте бидејќи тоа стана профитабилен бизнис“.
„Затоа ве молиме продолжете да ја споделувате, не само приказната за Хоуп, туку и сите ужасни приказни на нашите деца и да ја поддржите Land of Hope за да го направите нашиот глас посилен и помоќен“.
„Токму во овој момент дете е запалено живо. Околу децата ставаат автомобилски гуми и ги палат. Мора да го запреме тоа. Мртвите не можат да викаат за правда“.
И покрај сета суровост и тешкотиите на нашиот свет, ние не сме само затвореници на судбината. Нашите постапки се важни и можат да ја свртат историјата во правец на правдата“, вели Ања со заедничка фотографија споделена на Instagram.
