Шпанските истражувачи првично претпоставувале дека Долна Калифорнија е друг остров, а не долг полуостров. Така, ѝ го дале името Калифорнија инспирирани од еден роман објавен во Шпанија во 1510 година.
Романот „Las Sergas de Esplandián“ од Гарси Родригес де Монталво, опишува митски остров кој се наоѓа далеку западно од Индија. Островот бил населен со раса црни амазони управувани од жестока кралица по име Калифија. Единствениот метал познат на жителите на островот бил златото. Следствено, целото нивно оружје и алатки биле направени од злато. Ова, се разбира, им се допаднало на конквистадорите, па тие оптимистички го нарекле новооткриениот остров Калифорнија.
Подоцна, како што станало јасно дека тоа не билио остров туку полуостров, не само целиот полуостров туку и целата област северно од него станала позната како Калифорнија.
Денеска областа Калифорнија е поделена помеѓу Мексико и САД. Полуостровот наречен Долна Калифорнија е целосно во Мексико, додека горниот дел од областа е во САД и е познатата сојузна држава Калифорнија. Воедно, заливот помеѓу полуостровот и остатокот од Мексико се вика, погодувате, Калифорниски Залив.