Катарското Министерство за внатрешни работи и Комитетот за безбедност како дел од организацијата на Светското првенство во 2022 година ја избраа американската компанија Fortem Technologies за снабдувач на дронови за заштита на стадионите од потенцијални напади со беспилотни летала.
Fortem Technologies ќе ја користи својата технологија за да го заштити небото над стадионот, за потенцијалните напаѓачи да не прават проблеми со своите дронови.
Беспилотните летала развиени од оваа американска компанија се наречени DroneHunter. Овие летала се пресретнувачи управувани од радар и се целосно автономни во нивната работа, што значи дека немаат потреба од човечки надзор. По инсталирањето на радарот SkyDome, кој го скенира небото за натрапници, беспилотните летала се поставуваат во близина на објектите кои треба да се заштитат - доколку е потребно, тие можат да полетаат, да ги пресретнат несаканите дронови и да ги отстранат од небото со специјални мрежи.
Ако се прашувате зошто се користи пресретнување, а не попречување на RF сигнали - од компанијата велат дека попречувањето е интересна технологија која може да се користи за да се спречи 12-годишник да пука огномет со својот дрон, но за да се спречат посериозни закани, како што е тероризмот, неопходни се помоќни системи. Напредните напаѓачи не ги контролираат своите беспилотни летала од далечина, туку ги програмираат однапред, па употребата на сила е единствениот начин да се запрат таквите летала.
DroneHunter е дизајниран да биде брз и агилен, со забрзување од 0 до 100 км/час за помалку од секунда и високи максимални брзини. Кога ќе открие непријателско летало, го снима со радар и камера и ги испраќа овие податоци до автоматизираниот контролен центар. Таму системот ги анализира и избира едно од 68-те сценарија за соборување, во зависност од видот, големината и брзината на заканата. Дронот потоа го пресретнува леталото и испукува специјална мрежа кон него.
Ако целта е помала и побавна, DroneHunter зазема позиција од која може да ја фати во својата мрежа и да ја однесе до базата. Во случај на поголеми и побрзи дронови, мрежата се гаѓа кон нив од безбедно растојание, а неговата задача е само да се заплетка околу дронот и на тој начин да го собори. И во тој случај, слетувањето се врши меко, со помош на падобран.
