Температурите измерени во Виена во летниот период ги соборуваат рекордите од година во година и сѐ почесто се создаваат т.н. урбани острови на жештина (Urban Heat Islands).
Главниот град на Австрија се бори против тоа со „позеленување“ на градот, односно збогатување на јавните површини со содржини со зеленило и вода.
„Зелените фасади, покриви и дворови ја регулираат градската микроклима. Тоа придонесува за подобрување на работната клима во канцелариите, со оглед на тоа дека растенијата помагаат овие простории во летниот период подолго време да останат свежи. Еден зелен ѕид со површина од 850 метри квадратни во жежок летен ден разладува како 75 климатизери со капацитет од 3.000 W и осум часа непрекината работа. Исто така, значително се намалува урбаната бучава, а растенијата ги филтрираат штетните материи од воздухот и произведуваат кислород“, вели градската советничка за животна средина Ули Сима.
Растенијата што лазат по ѕидови не само што го чистат јаглерод диоксидот од воздухот, туку и „се потат“ на сонце, што значи дека водата што испарува од нив ја освежува околината.
