Отава се правда со технички пречки во одбивање на Москва за екстрадиција на СС ветеранот Јарослав Хунка, кој среде канадскиот Парламент гордо изјави дека се борел против Русија, но заборави да додаде дека тоа било во униформа на СС војник на Адолф Хитлер.
Канадската влада го отфрли барањето на Русија за екстрадиција на ветеранот на СС, Јарослав Хунка, наведувајќи дека нема релевантен договор меѓу двете земји, потврди московскиот амбасадор во Отава.
Москва испрати барање за екстрадиција до Отава во декември, врз основа на обвиненијата против Хунка поднесени од Канцеларијата на руското државно обвинителство. 98-годишниот канадски Украинец јавно призна дека доброволно се приклучил на дивизијата Вафен-СС Галиција за време на Втората светска војна, откако беше почестен со овации во канадскиот Парламент за време на минатогодишната посета на украинскиот претседател Владимир Зеленскиј.
„Малку е веројатно дека отсуството на договор за екстрадиција може да послужи како причина за одбивање“, рече во вторникот амбасадорот Олег Степанов, нарекувајќи го „очигледен политички мотивиран изговор“.
Степанов истакна дека Канада можела да го обвини Хунка за воени злосторства за неговата активност во СС, но се чини дека одлучила да не го стори тоа. Ако Хунка лажел дека е член на СС на неговата апликација за државјанство - како што очигледно изгледа дека лажел - тогаш Отава во најмала рака би можела да му го одземе државјанството, додаде тој.
„Еве го лакмус тестот за канадското прикривање на нацизмот. Дали криминалецот ќе биде казнет или ќе продолжи да ги живее своите удобни пензионерски години во земја која е толку горда на своите правни стандарди?“, изјави Степанов.
Во секој случај, Русија има намера да „продолжи да бара правда“ по ова прашање, рече амбасадорот.
Хунка беше почесен гостин во канадскиот Парламент минатиот септември и беше претставен како „канадски херој“ кој „се бореше за украинската независност против Русите“ низ громогласен аплауз. Инцидентот го осудија Русија, Полска и ОН, додека канадската опозиција го обвини премиерот Џастин Трудо дека лаже за неговата улога во аферата. Претседателот на Претставничкиот дом, Ентони Рота, ја презеде вината за инцидентот и поднесе оставка.
Во октомври 2023 Русија го обвини Хунка за геноцид и издаде налог за негово апсење. Руските дипломати го посочија инцидентот како доказ за нацистичкото влијание во Канада. Претседателот Владимир Путин, исто така, се осврна на аферата во минатонеделното мега гледано интервју со американскиот новинар Такер Карлсон.
Дивизијата Галиција преминала од доброволна украинска СС-дивизија во Вафен-СС гранадерска дивизија. Тие беа обвинети за бројни воени злосторства над Евреите, Полјаците и советските цивили. Дивизијата била уништена во Битката кај Броди во јули 1944 година, но нацистичка Германија ја обновила и ја искористила за тероризирање на цивилите во Словачка и Југославија.
Во април 1945 Третиот Рајх ја предал дивизијата на Украинскиот национален комитет. Нејзините преживеани членови им се предале на Британците во Австрија. Околу 8.000 од нив подоцна добиле засолниште во Британскиот Комонвелт, а многумина завршиле во Канада, како што е случајот со Хунка.
