Фудбалската федерација на Македонија потврди дека по налог на УЕФА ќе биде инсталирана ВАР технологија на стадионот „Тоше Проески“ која ќе се користи на претстојниот бараж натпревар.
На 8 октомври од 20:45 часот Македонија го игра полуфиналето од баражот за пласман на ЕУРО против репрезентацијата на Косово. Бидејќи натпреварот е од голема важност, како и сите остранати баражи кои ќе се играаат тој ден, УЕФА нареди да биде инсталирана ВАР технологија со што би се елиминирале евентуалните судиски грешки.
Опремата ќе мора да биде подготвена до 7 октомври, односно ден пред натпреварот, кога ќе биде направено тестирање на истата под будното око на претставник од компанијата HAWKEYE која е избрана од УЕФА за имплементација на ВАР системот.
ВАР ќе биде уште еднаш тестиран на два часа пред почеток на натпреварот и доколку сѐ биде в ред ќе се употребува на натпреварот. Доколку системот потфрли, натпреварот ќе се одигра без ВАР.
