Во квалификациите за пласман на Мундијалот во Катар во зоната на Северна Америка падна неверојатен гол откако играч со грб ја затресе противничката мрежа.
Веројатно се сеќавате на оној легендарен гол на Горан Пандев кога одбиена топка му се удри од глава и заврши во противничката мрежа. Ако не се сеќавате, ќе ве потсетиме: во сезоната 2019/20 Џеноа играше дома против Сасуоло, а при резултат од 1:1 Пандев се најде во одлична шанса, но неговиот удар голманот го одбрани. Сепак, одбиената топка заврши во главата на Горан, кој беше во пад, и повторно отиде кон голот, овој пат завршувајќи во мрежата.
Тоа изгледаше вака:
Сега сличен гол постигна и Канаѓанецот Атиба Хачинсон, но уште побизарен. На гостувањето кај Ел Салвадор, каде Канада победи со 0:2, првиот гол е оној кој нѐ интересира. Кајл Ларин нафрли од десно, ветеранот Хачинсон на прва статива се обиде со глава, но ја погоди токму стативата. Топката се одби во ногата на домашниот дефанзивец Ерик Сабалета, а потоа од грбот на паднатиот Хачинсон замина зад гол-линијата.
Хачинстон, кој во вторник ќе полни 39 години, настапува за Бешикташ, а репрезентативец на Канада е уште од 2003 година.