Возачот на Мерцедес, Луис Хамилтон, се надева дека Ред Бул нема да биде 30 секунди пред сите на Јапонското ГП, што е претстојната трка од шампионатот во Формула 1.
Возачите на Ред Бул сезонава победија на 14 трки во Формула 1, а нивната доминација ја прекина Ферари, кој победи на Големата награда на Сингапур.
„Се надевам дека Ред Бул нема да биде 30 секунди пред сите, како што се случуваше во минатото. Имаа тежок викенд, но нивниот болид треба да биде одличен овде. Имаат одличен ритам во текот на целата година, а Јапонија навистина им одговара“, рече Хамилтон.
Понатаму рече дека Мерцедес се подобрил во текот на оваа сезона и дека очекува тој тренд да продолжи.
„Што се однесува до Мерцедес, сакаме да бидеме што е можно поблиску до Ред Бул. Има работи каде што се подобривме и очекуваме тој тренд да продолжи“, додаде Хамилтон.
Трката за Големата награда на Јапонија е закажана за в недела со почеток во 7 часот наутро по македонско време.
