Извори блиски до францускиот фудбалер уверуваат дека проблемот со ПСЖ „оди и ндвор од фудбалот“ и дека во наредните денови ќе се знае што всушност се случува зад неговиот нов проблем во клубот, објави L'Équipe.
Првично шпанските, а потоа и француските медиуми синоќа ја објавија информацијата и бомбастичната вест дека Килјан Мбапе сака да го напушти ПСЖ во јануари и кариерата да ја продолжи во друг клуб. Тој со парискиот клуб има договор до јуни 2025 година откако во мај годинава потпиша продолжување.
„Напаѓачот на ПСЖ се чувствува изневерен од челниците на клубот и верува дека ветувањата што ги доби не се исполнети“, пишува Le Parisien, а веста набрзо ја потврди и L'Équipe.
L'Équipe продолжи да ја истражува оваа тема, а рано утринава го објави сознанието дека проблемот со Мбапе всушност не е „од фудбалска природа“, туку дека проблемот е целосната атмосфера што е создадена околу него.
Понатаму додаваат дека во наредните денови овој одличен крилен напаѓач ќе излезе во јавноста и ќе ја открие својата страна на приказната, а на крајот истакнаа дека ПСЖ нема апсолутно никаква намера да го продаде овој играч и дека ќе направи сѐ за уште еднаш да му угоди и да го исполни сите барања што ги има.
Мбапе синоќа играше против Бенфика во натпреварот од 4. коло од групната фаза на Лигата на шампионите и постигна гол од пенал, но ПСЖ на крајот не славеше бидејќи натпреварот заврши со 1:1 откако португалскиот тим израмни преку Жуау Мариу во 62. минута, исто така од белата точка.
