Бразилската полиција во понеделникот расчисти протестен камп пред седиштето на вооружените сили во Бразилија и приведе околу 1.500 луѓе, еден ден откако радикалните поддржувачи на поранешниот десничарски претседател Жаир Болсонаро ги нападнаа државните институции.
Илјадници демонстранти упаднаа во Конгресот, Врховниот суд и претседателската палата во неделата, одбивајќи да го признаат изборниот пораз на Болсонаро од левичарот Луис Инасио Лула да Силва, кој пред една недела положи заклетва како претседател на Бразил.
Болсонаро, кој моментално живее во американската сојузна држава Флорида, никогаш јавно не ја објавил и признал загубата на изборите.
По насилството во неделата, Врховниот суд нареди камповите на демонстрантите, вклучително и тој пред воениот штаб, да бидат расчистени во рок од 24 часа, што предизвика голема полициска операција, објави порталот Г1.
Во неделата беа уапсени 230 осомничени бунтовници кои ја ограбија зградата на Конгресот, пробија барикади, се качија на покривот и кршеа прозорци за време на насилството во Бразилија.
Демонстрантите потоа го насочија својот гнев кон блискиот Врховен суд и претседателската палата, а на безбедносните сили им беа потребни неколку часа да ја вратат контролата врз областа.
Лула, кој нападот го нарече обид за државен удар, потпиша декрет за федерална интервенција, дозволувајќи и на владата да ја преземе одговорноста за јавната безбедност во Бразилија, „како одговор на терористички акт“.
Во телефонскиот разговор со бразилскиот претседател во понеделникот, американскиот претседател Џо Бајден ја пренесе „непоколебливата поддршка“ на неговата земја за „бразилската демократија и слободната волја на бразилскиот народ изразена на неодамнешните претседателски избори“.
Бајден, исто така, го покани Лула на „консултации за широка заедничка програма“ во Белата куќа на почетокот на февруари, што бразилскиот претседател го прифати, се вели во заедничката изјава.
