Херојот на Турција славеше со поздравот на Сивите волци и предизвика скандал, му прети казна

Херојот на Турција од осминафиналето, Мерих Демирал, би можел да биде казнет поради прославувањето на вториот гол против Австрија, која Турците ја совладаа со 2:1.

Демирал постигна два гола, а вториот на крај го прослави и со кренати раце високо во воздух додека гестикулираше со прстите покажувајќи го поздравот на турската ултранационалистичка организација Bozkurtlar (Бозкуртлар), односно Сиви волци.

Сивите волци претставуваат идеологија која тврди дека турската раса е супериорна во однос на другите и се стреми кон обединување во една земја од Балканот па сѐ до Кина.

„Начинот на кој го прославив голот има врска со мојот турски идентитет, затоа и го направив тој гест. Видов луѓе на стадионот со истиот гест, нема скриена порака“, изјави Демирал и истакна дека се надева ќе има уште една можност да го покаже спорниот поздрав.

„Сите сме Турци, јас сум многу горд што сум Турчин. Само сакав да покажам колку сум среќен, се надевам дека ќе има повеќе можности повторно да го покажам тој гест“, додаде тој.

Сивите волци се познати по нападите врз малцинските заедници во Турција и во странство, пред с Курдите, Грците, Арапите и Ерменците. Во 2021 година Европскиот парламент ги повика земјите-членки да го прогласат движењето Сиви волци за терористичко и да ја забранат групата во Европа.

Инаку, поздравот на Сивите волци е забранет во Австрија и за негово прикажување се плаќа казна од 4.000 евра, а каква одлука ќе донесе УЕФА за тоа, останува да видиме.

26-годишниот Демирал од лани игра за саудискиот Ал Ахли, а претходно настапуваше за Аталанта, Јувентус, Сасуоло, Спортинг и Алканененсе. Кариерата ја почна во младинскиот погон на Фенербахче.

За потсетување, Турција в сабота ќе игра четвртфинален натпревар против Холандија каде ќе се обиде да се пласира во полуфиналето.